ករណីស្តារព្រែកតាពៅនៅក្រុងបាវិត មន្ត្រីអ្នកមានឥទ្ធិពលកំពុងទទួលបានផលប្រយោជន៍យ៉ាងច្រើន

ស្វាយរៀង៖ ក្រុមគ្រឿងចក្រឯកជនតូចៗអះអាងថា លោកផ្កាយ១ ចាន់ រតនៈហៅឌឿក យកដីព្រែកតាពៅជាង៤០ហិកតានៅសង្កាត់-ក្រុងបាវិត មកធ្វើអាជីវកម្ម ចែកប្រយោជន៍គ្នាជាមួយអាជ្ញាធរ។ រីឯក្រុមគ្រឿងចក្រឯកជនទទួលបានផលប្រយោជន៍តិចតួចប៉ុណ្ណោះ។អាជីវករគ្រឿងចក្រខ្នាតធំដោយប្រើរថយន្តយីឌុបលើក ឡើងថា លោកឧត្ដមសេនីយ៍ត្រី ចាន់ រតនៈ ហៅឌឿកបានយកដីព្រែកតាពៅដែលជាដីសាធារណៈរបស់រដ្ឋ ទំហំជាង៤០ហិកតា មកធ្វើអាជីវកម្មកាយយកអាចម៍ដីលក់ក្នុង១ថ្ងៃៗរាប់ពាន់ឡាន បានលុយរាប់ម៉ឺនដុល្លារជ្រកក្រោមហេតុផលគម្រោងស្ដារព្រែកនិងមានការយល់ព្រមសម្របសម្រួលពីអាជ្ញាធរ។

ប្រជាពលរដ្ឋរស់នៅក្រុងបាវិត ក៏ដូចជាក្រោមអាជីវករដែលកំពុងប្រកបរបររកស៊ីធីកាយអាចដីនៅបឹងព្រែកតាពៅនោះ មើលឃើញថាផលប្រយោជន៍ជាច្រើនត្រូវបានធ្លាក់ទៅលើកណ្ដាប់ដៃពួកឈ្មួញធំដែលមានឥទ្ធិពលនិងអាជ្ញាធរក្រុងតែម្ដង។ សព្វថ្ងៃនេះប្រជាពលរដ្ឋក្លាយ ទៅជាជនរងគ្រោះនៃការស្ដារព្រែក នេះតាមរយៈការហុយធូលីមិនឈប់ឈរនិងផ្លូវខូចខាតជាច្រើនកន្លែង។

លោកឧត្ដមសេនីយ៍ត្រី ចាន់ រតនៈ ជាមន្ត្រីយោធានៅខេត្តស្វាយរៀងទទួលស្គាល់ថា ខ្លួនពិតជាបានលក់អាចម៍ដីប្រាកដមែន។ ចំណែកលោកអភិបាលក្រុងបាវិតថ្លែងថា រឿងលុយកាក់ ដែលបានពីការលក់អាចម៍ដីនោះ គឺលោកពុំដឹងទេ។

អ្នករកស៊ីគ្រឿងចក្រអះអាងថា លោកឧត្ដមសេនីយ៍ត្រី ចាន់ រតនៈហៅឌឿក ជាមនុស្សដែលគេប្រើនិងមានឥទ្ធិពលខ្លាំង។ លោកមានសិទ្ធិអំណាច ក្នុងការគ្រប់គ្រងនិងយកដីព្រែកតាពៅ មកធ្វើអាជីវកម្ម(លក់អាចម៍ដី) បានលុយរាប់ម៉ឺនដុល្លារក្នុង១ថ្ងៃៗ សម្រាប់ចែកគ្នាជា មួយអាជ្ញាធរនិងមន្ត្រីជំនាញពាក់ព័ន្ធ ។

ប្រភពពីក្រុមនៅរកស៊ីដឹកអាចដីនៅទីនោះបានឲ្យដឹងថា ក្នុង១ថ្ងៃៗលោកឌឿកអាចលក់អាចម៍ដី បានជាង១ពាន់ឡានឯណោះ ហើយសកម្មភាពទាំងនេះ បានប្រព្រឹត្ត ទៅ អស់រយៈពេលជាង៤ខែមកហើយ។

ក្រុមអាជីវករបញ្ជាក់ថា រថយន្តបែនចំណុះ៥តោនលោកឌឿកកំណត់យកលុយចំនួន៨.៥ដុល្លារ ក្នុង១ ជើងជា កំហិត,រថយន្តកង់១០កំណត់យកចំនួន១៥ដុល្លារ ក្នុង១ ជើង និងរថយន្តយីឌុប យកចំនួន២០ដុល្លារក្នុង ១ជើងជាកំហិត។

អាជីវករបញ្ជាក់ថា ការបង់លុយក្នុងតម្លៃនេះ គឺពួកគាត់ចូលយកអាចម៍ដីព្រែកតាពៅដោយប្រើ(SK)កាយដីខ្លួនឯង,ចាក់ប្រេងខ្លួនឯង,រកទីផ្សារចាក់ដីឡូត៍ដោយ ខ្លួនឯង។ រីឯលោកឌឿកដាក់មេការកត់បុង និងរាប់ក្បាលឡានយកលុយ ដោយគ្មានការលើកលែងសុំថ្លៃមិនចុះនោះឡើយ។

បើតាមអាជីវករគ្រឿងចក្រ សម្រាប់រថយន្តយីឌុបជា មធ្យមពួកគាត់ចាក់តាមដីឡូត៍ បានតម្លៃ៥៥ដុល្លារក្នុង១ឡាន។ លុះផាត់សោហ៊ុយ(SK)កាយដាក់ឡានដឹកជញ្ជូន,ស្រោចទឹកឈូសឆាយ,ថែទាំផ្លូវ,សំអាតកន្លែងចាក់ដីឡូត៍,ថ្លៃប្រេង,កម្មករ,ពលកម្មតៃកុងគ្រឿងចក្រនិងបង់ឱ្យលោក”ឌឿក”ចំនួន២០ដុល្លារក្នុង១ឡានទៀត សឹងតែលែងចំណេញតែម្ដង។

រីឯរថយន្តកង់១០ ជាមធ្យមចាក់តាមដីឡូត៍ ក្នុងតម្លៃ ៤០ដុល្លារក្នុង១ឡាន។ ពេលទូទាត់ផាត់សោហ៊ុយ (SK)កាយដាក់ឡាន,ដឹកជញ្ជូន,ស្រោចទឹក,ឈូសឆាយ និងបង់ឱ្យលោក”ឌឿក” ចំនួន១៥ដុល្លារក្នុង១ឡានទៀត គឺយ៉ាប់កាន់តែខ្លាំងទៅទៀត។ ចំណែករថយន្តចំណុះ៥តោន ជាមធ្យម ចាក់តាមបណ្ដាដីឡូត៍ក្នុងភូមិសាស្ត្រក្រុងបាវិត បានតម្លៃ២៥ដុល្លារក្នុង១ឡាន។

ក្នុងនោះ ផាត់សោហ៊ុយនិងចំណាយផ្សេងៗ និងបង់ឱ្យឈ្មោះ”ឌឿក” ចំនួន៨.៥ដុល្លារក្នុង១ឡានទៀត គឺពិបាករកប្រាក់ចំណេញមែនទែន។

លោកឧត្ដមសេនីយ៍ត្រី ចាន់ រតនៈហៅឌឿក ថ្លែងថា ការលក់អាចម៍ដីនោះ គឺដើម្បីយកប្រាក់មកទ្រទ្រង់គម្រោងជីកស្ដារព្រែកតាពៅ។ លោកបន្តថា អាចម៍ដីខ្លះយើងលក់,ខ្លះឱ្យគេនិងខ្លះទៀតយកមកជួសជុលផ្លូវ ខណៈក្រុមហ៊ុនលោកទទួលបានគម្រោងជីកស្ដារ តែជាង៣ គីឡូម៉ែត្រប៉ុណ្ណោះ។

លោក សាញ់ សាខុន ចៅសង្កាត់បាវិតបានថ្លែងថា រឿងបង់សួយសារឬអត់ លោកពុំបានដឹងទេ ព្រោះជាគម្រោងរបស់ខេត្ត ដោយលោករុញឱ្យទៅសួរលោកអភិបាល ក្រុងបាវិត។

លោក លឹម សៀងហេង អភិបាលក្រុងបាវិតបានថ្លែងថា រដ្ឋបាលខេត្ត ជាអ្នកប្រគល់សិទ្ធិឱ្យក្រុមហ៊ុនជីកដីព្រែកតាពៅដើម្បីជាអាងស្តុកទឹកនៅក្រុងបាវិត។ ចំពោះសំនួរថា តើការលក់អាចម៍ដីនោះយកលុយទៅណា?និងបានបង់សួយសារឬអត់..?។ លោកអភិបាលក្រុង ឆ្លើយថា "ខ្ញុំម៉េចដឹង! ព្រោះជាការចាត់ចែងរបស់ក្រុមហ៊ុន ខណៈរដ្ឋបាលក្រុងចាំទទួលតែគម្រោងដែលស្ដាររួចប៉ុណ្ណោះ"។

លោកប៉ុក តកប្រធានមន្ទីររ៉ែនិងថាមពលខេត្តស្វាយរៀង ថ្លែងថា ការជីកស្ដារព្រែកតាពៅជាគម្រោងរបស់ខេត្ត។ ការយកអាចម៍ដីមកធ្វើអាជីវកម្ម តើបានបង់សួយសារឬទេ..?ត្រង់ចំណុចនេះលោក ប៉ុក តក បានឆ្លើយថា"ខ្ញុំមិនដឹងទេ"នឹងរុញឱ្យទៅសួរខេត្ត។

ពលរដ្ឋរស់នៅក្រុងបាវិតទទូចស្នើសុំស្នើដល់ លោក ប៉េង ពោធិ៍សា អភិបាលខេត្តស្វាយរៀង,លោក កែវ រតនៈ រដ្ឋមន្ត្រីក្រសួងរ៉ែ និងថាមពល,លោក ថោ ជេដ្ឋា រដ្ឋមន្ត្រីក្រសួងធនធានទឹកនិងឧតុនិយម,អភិសន្តិបណ្ឌិត ស សុខា ឧបនាយករដ្ឋមន្ត្រីរដ្ឋមន្ត្រីក្រសួង មហាផ្ទៃជាពិសេសសម្ដេចធិបតី ហ៊ុន ម៉ាណែត នាយករដ្ឋមន្ត្រី ចាត់មន្ត្រីជំនាញចុះពិនិត្យស្រាវជ្រាវ ពីភាពមិនប្រក្រតី នៃការយកដីសាធារណៈ មកធ្វើអាជីវកម្មដោយខុសច្បាប់នេះផង៕

(សូមអានបន្ត)

មួយករណីនេះក៏ក្រើកខេត្តបាត់ដំបងហើយបងប្អូន កម្លាំងជំនាញចុះត្រួតពិនិត្យទីតាំងការដ្ឋានជនជាតិចិនមួយកន្លែងរកឃើញរថយន្តចង្កូតស្តាំជាច្រើនគ្រឿង និងឈើប្រណីតជាច្រើនម៉ែត្រគូប

ខេត្តបាត់ដំបង៖ កម្លាំងកងរាជអាវុធហត្ថ ដែលដឹកនាំដោយ លោក វរសេនីយ៍ឯក ជា តារា មេបញ្ជាការរងកងរាជអាវុធហត្ថខេត្តបាត់ដំបង ដោយមានការសម្របសម្រួលពីព្រះរាជអាជ្ញារង ទុត វីនីត និងកម្លាំងគយ កម្លាំងរដ្ឋបាលព្រៃឈើ កម្លាំងអាជ្ញាធរភូមិ-ឃុំ បានចុះត្រួតពិនិត្យទីតាំងការដ្ឋានជនជាតិចិនមួយកន្លែង។

យោងតាមការចុះផ្សាយតាមផេកផ្លូវការរបស់បញ្ជាការដ្ឋានកងរាជអាវុធហត្ថខេត្តបាត់ដំបង នាល្ងាចថ្ងៃទី២២ ខែមីនា ឆ្នាំ២០២៥ បានបញ្ជាក់ថា កិច្ចចុះប្រតិបត្តិការត្រួតពិនិត្យទីតាំងការដ្ឋានរបស់ជនជាតិចិនខាងលើ ធ្វើឡើងកាលពីវេលាម៉ោង ០៩និង០០នាទី ថ្ងៃទី២២ ខែមីនា ឆ្នាំ២០២៥ ស្ថិតនៅភូមិបឹងអំពិល ឃុំស្ដៅ ស្រុករតនៈមណ្ឌល ខេត្តបាត់ដំបង ដែលមានម្ចាស់ ឈ្មោះ លីយ៉ុងកួយ ភេទប្រុសអាយុប្រហែល៥៥ឆ្នាំ ជាជនជាតិចិន និងអ្នកតំណាងឈ្មោះ វ៉ាន់ សុជាតា ភេទស្រីអាយុ៣៣ឆ្នាំ មុខរបរគណនេយ្យ មានទីលំនៅភូមិព្រែកនរិន្ទ ឃុំព្រែកនរិន្ទ ស្រុកឯកភ្នំ ខេត្តបាត់ដំបង។ 

ជាមួយកិច្ចប្រតិបត្តិការខាងលើនេះ មន្ត្រីជំនាញបានរកឃើញ , ក្បាលរថយន្តសណ្តោងរឺម៉កចង្កូតស្ដាំចំនួន១៤គ្រឿង , រថយន្តទេសចរណ៍ចំរុះម៉ាកចង្កូតស្តាំ ចំនួន ១០គ្រឿង , រឺម៉កសណ្តោងមានសាទែន ចំនួន២គ្រឿង , សាមីរឺម៉ក ចំនួន៤ គ្រឿង , ឧបករណ៍សម្រាប់ដាប់លេខតួរថយន្ត ចំនួន ១ឈុត និងឈើមួយចំនួនផងដែរ។

ក្រោយពីធ្វើការត្រួតពិនិត្យរួចរាល់ រថយន្តចង្កូតស្តាំខាងលើត្រូវបានប្រគល់អោយគយនឹងរដ្ឋាករដើម្បីចាត់ការតាមនីតិវិធី ចំណែកឈើត្រូវបានប្រគល់អោយរដ្ឋបាលព្រៃឈើចាត់ការតាមនីតិវិធី ។

(សូមអានបន្ត)

ទីតាំងជល់មាន់អនឡាញ១កន្លែងបង្កប់នៅក្នុងតារាងបាល់ទះ កំពុងដំណើរការក្បែរផ្សារតាលោសែនជ័យ

ខេត្តពោធិ៍សាត់÷ រូបភាពដែលអ្នកកាសែតបានថតផ្ទាល់ អំពីទីតាំងល្បែង ស៊ីសងអនឡាញមាន់ជល់មួយ កន្លែងកំពុងដំណើរការស្ថិតនៅក្នុងតារាងបាល់ទះ១កន្លែងនៅចម្ងាយប្រហែល ១៧៥ម៉ែត្រ ខាងលិចក្បែរផ្សារតាលោសែនជ័យ។ អ្នកទៅលេងបាល់ទះ អាចចំណាយ ពេលវេលាប្រាក់កាសចាក់ល្បែងមាន់ជល់អនឡាញ យ៉ាងសប្បាយរីករាយ ដោយមិនរំខានសមត្ថកិច្ចនគរបាលប៉ុស្តិ៍តាលោសែនជ័យ ក៏ដូចជាលោកអធិការស្រុកនោះឡើយ។

ប្រភពបានឱ្យដឹងថា តាមរយៈអេក្រង់កុំព្យូទ័រតូចមួយគ្រឿងអាចដំណើរការបានដោយស្រួលសម្រាប់មាន់ជល់អនឡាញនៅទីតាំងខាងលើ ហើយប្រមូលបានអ្នកលេងយ៉ាងច្រើនសន្ធឹកសន្ធាប់។ ទីតាំងល្បែងស៊ីសង១កន្លែង នេះកំពុងដំណើរការជាចំហដោយគ្មានការលាក់បាំងអ្វីឡើយដោយស្ថិតនៅតំបន់ផ្សារ ដោយមានប្រជាពលរដ្ឋចូលលេងយ៉ាងច្រើនកុះករ។ អាជ្ញាធរមានសមត្ថកិច្ចមិនឃើញមានការចុះបង្ក្រាបឬត្រួតពិនិត្យអ្វីឡើយ។ ជាងនេះទៀតអធិការនគរបាលស្រុកតាលោសែនជ័យលោក អុល ហៃ បង្ហាញភាពស្ងៀមស្ងាត់ជាដរាប។

អ្នកភូមិនៅក្បែរនោះបានឱ្យដឹងថា ទីតាំងល្បែងស៊ីសងអនឡាញខាងលើនេះដំណើរការស្ទើរ២៤ម៉ោងលើ ២៤ ម៉ោង ដោយបានទាក់ទាញអ្នកញៀនល្បែងចូលលេងមិនថា យប់ឬថ្ងៃនោះឡើយ។ គ្រាន់តែ១កន្លែងនេះមានមាន់ជល់អនឡាញនិងបាល់ទះភ្នាល់ដាក់លុយផងដែរ។ បើប្រៀបធៀបទៅនឹងទីតាំងផ្សេងៗ នៅក្នុងស្រុកតាលោសែនជ័យនេះ គេកត់សម្គាល់ថា ទីតាំងខាងលើទាក់ ទាញអតិថិជនអ្នកញៀនល្បែងចូលលេងយ៉ាងច្រើនព្រោះមានល្បែងច្រើនមុខ។ មូលហេតុដែលនាំឲ្យ មានអតិថិជនច្រើនចូលលេងល្បែង ត្រូវគេប្រាប់ថា ពីព្រោះកន្លែងខាងលើនេះមានសុវត្ថិភាព។ មិនមានសមត្ថ កិច្ចណាទៅរំខានដល់អ្នកលេងល្បែងទាំងនោះទេ។

ប្រភពរាយការណ៍ថា ម្ចាស់ទីតាំងខាងលើហាក់ដូចជាមានអភ័យឯកសិទ្ធិណាមួយ ក្នុងការបោះទីតាំងល្បែង ស៊ីសងនៅក្នុងមូលដ្ឋានខាងលើ បើទោះបីជាល្បែងនេះខុសនឹងច្បាប់ប្រទេសក៏ដោយ។ ប្រភពបន្ថែមថា គេឃើញសមត្ថកិច្ចប្រដាប់អាវុធ(ទំនងនគរបាលប៉ុស្តិ៍)ចុះមើលទីតាំងល្បែងស៊ីសងនៅចំណុចខាងលើនេះញឹក ញាប់ដែរ ប៉ុន្តែមិនមែនជាការបង្ក្រាបនោះឡើយ។ គេមិនដឹងថា តើមន្ត្រីនគរបាលទាំងនោះចុះមកត្រួតពិនិត្យ បញ្ហាអ្វីនៅលើកទីតាំងល្បែងស៊ីសងខាងលើនោះទេ? ប៉ុន្តែគេដឹងច្បាស់ថា មិនមែនជាការចុះមកបង្ក្រាបនោះឡើយ។ ទាំងលោកអុល ហៃ អធិការនគរបាលស្រុកតាលោសែនជ័យ ក៏ដូចជាលោកវុធ នាយប៉ុស្តិ៍តាលោសែនជ័យ គឺស្ងៀមស្ងាត់រហូត។

ប្រជាពលរដ្ឋនៅក្នុងមូលដ្ឋានខាងលើកត់សម្គាល់ឃើញ ថា អ្នកភូមិមួយចំនួនធំបាន ចំណាយពេលវេលានិងលុយកាក់នៅលើទីតាំងល្បែងស៊ីសងខាងលើនេះ។ ជាងនេះទៅទៀតបញ្ហាអសន្តិសុខ ក្នុងមូលដ្ឋានក៏ដូចជាអំពើហិង្សាក្នុងគ្រួសារ មានការកើនឡើងគួរឲ្យកត់សម្គាល់ផងដែរ។ ដូច្នេះពួកគាត់ស្នើសុំឲ្យស្នងការនគរបាលខេត្ត ពោធិ៍សាត់ ចាត់វិធានការបង្ក្រាបទីតាំងល្បែងស៊ីសងខាងលើនេះផង៕

(សូមអានបន្ត)

ព្រះសង្ឃ ជួន កក្កដា លាចាកសិក្ខាបទនៅថ្ងៃនេះ បន្ទាប់ពីសាងផ្នួសក្បែរ៣០ឆ្នាំ

(តាកែវ)៖ ព្រះវិន័យធរគណខេត្តតាកែវ និងជាព្រឹទ្ធបុរសរងនៃពុទ្ធិកសកលវិទ្យាល័យព្រះសីហនុរាជ នាយកសាលាពុទ្ធិកប្រាសាទនាងខ្មៅ ព្រះធម្មវិជ្ជា ជួន កក្កដា នៅព្រឹកថ្ងៃទី១៩ ខែមីនា ឆ្នាំ២០២៥នេះ បានលាចាកសិក្ខាបទហើយ។

ព្រះធម្មវិជ្ជា ជួន កក្កដា បានសាងផ្នួសជាសង្ឃ ក្នុងវ័យ១៣ឆ្នាំ កាលពីឆ្នាំ១៩៩៨ មកដល់ពេលនេះ មានរយៈពេល២៧ឆ្នាំហើយ។

ព្រះតេជគុណ ព្រះធម្មវិជ្ជា ជួន កក្កដា បានមានសង្ឃដីកា នៅក្នុងវីដេអូឃ្លីបមួយ នាព្រឹកនេះថា «នៅថ្ងៃនេះ ខ្ញុំព្រះករុណាអាត្មាភាពបានថតវីដេអូនេះ គឺជាវីដេអូចុងក្រោយ នូវការតាំងនៅភេទជាបុព្វជិត ខ្ញុំព្រះកុរណា អាត្មាភាព នឹងលាចាកសិក្ខាបទនៅថ្ងៃនេះ គឺប្រមាណជាម៉ោង៨ទៅ៩ព្រឹកនេះ ។ ដូច្នេះដំណឹងនេះក៏ចាត់ទុកថាជាការប្រគេននឹងជូនដំណឹងដល់ព្រះសង្ឃគ្រប់ព្រះអង្គ ទាំងអស់ នៅក្នុងព្រះពុទ្ធសាសនមណ្ឌល និងជូនដំណឹងដល់ពុទ្ធបរិស័ទទាំងអស់ដែលជាញាតិមិត្តព្រះធម៌ ជាពុទ្ធបរិស័ទនៅក្នុងព្រះពុទ្ធសាសនាយើងនេះ ដែលធ្លាប់តែបានស្តាប់ និងគាំទ្រចំពោះខ្ញុំករុណា អាត្មាភាព ក៏ដូចជាធ្លាប់ស្គាល់ខ្ញុំករុណាអាត្មាភាពតាំងតែពីការសម្តែងព្រះធម៌ទេសនា ទាំងការដែលទំនុកបម្រុង ចិញ្ចឹមព្រះសង្ឃ នៅក្នុងវត្តប្រាសាទនាងខ្មៅកន្លងមក។ ពេលវេលាសម្រាប់សត្វលោក គឺមិនទៀង មិនទាត់ មិនថិតថេរ មិនជាក់លាក់ មិនប្រាកដ។ ដូច្នេះ ជីវិតជាបុព្វជិតរបស់ខ្ញុំករុណាអាត្មាភាពក៏មានកាលវេលា មិនទៀង មិនថិតថេរ មិនប្រាកដដូចគ្នា។ ហើយបួស ប្រាកដជាមានសឹក ខ្ញុំករុណាអាត្មាភាពបានសាងផ្នួសតាំងពីអាយុ១៣ឆ្នាំ ចូលក្នុងព្រះពុទ្ធសាសនា បច្ចុប្បន្ននេះមានព្រះជន្ម៤០ឆ្នាំគត់ហើយ។ ជីវិតព្រះផ្នួសមានរយៈពេល២៧ចូល២៨ព្រះវស្សានេះ ខ្ញុំព្រះករុណាអាត្មាភាព ពិតជាអរព្រះគុណដ៏ក្រៃលែងចំពោះព្រះរតនត្រ័យទាំងឡាយ៣ មានព្រះពុទ្ធ ព្រះធម៌ ព្រះសង្ឃ។ ជាពិសេសគឺព្រះពុទ្ធសាសនា ដែលជាសាសនាមានគុណមហាធំធេង សម្រាប់ខ្ញុំព្រះករុណា អាត្មាភាពបាន ចូលមកជ្រកកោណ រស់រានមានជីវិត មានឱកាសបានរៀនសូត្រសិក្សា មានឱកាសបានឧបត្ថម្ភទំនុកបម្រុងផ្ចុងផ្តើមចំពោះព្រះសង្ឃ នៅក្នុងព្រះសាសនមណ្ឌល ជាពិសេសគឺនៅក្នុងវត្តប្រាសាទនាងខ្មៅនេះ អស់រយៈពេល១៣ឆ្នាំ កន្លងទៅនេះ។ ហើយអ្វីដែលខ្ញុំព្រះករុណា អាត្មាភាព បានកំណត់ពេលវេលា ដើម្បីលាចាកសិក្ខាបទ គឺមិនមែនជាការតក់ក្រហល់ពេកទេ ហើយក៏មិនមែនជាការប្រញាប់ពេកដែរ ក៏ប៉ុន្តែខ្ញុំករុណាអាត្មាភាពព្យាយាមិនប្រគេន និងជូនដំណឹងជាមុន ព្រោះដឹងថាញោមញាតិទាំងអស់គាំទ្រស្រឡាញ់ ចូលចិត្ត ហើយនឹងជ្រះថ្លាជាច្រើន ទាំងក្នុង និងក្រៅប្រទេស ដូច្នេះនៅពេលលាចាកសិក្ខាបទនឹងជូនដំណឹងតែម្តង។ នៅពេលដែលញោមបានទស្សនា បានឃើញវីដេអូនេះ មានន័យថា ខ្ញុំករុណា អាត្មាភាពនឹងទៅជាគ្រហស្ថនៅពេលដ៏ខ្លីខាងមុខនេះ ហើយក៏សុំអធ្យាស្រ័យ អភ័យអត់ទោស ចំពោះសម្តេចជាអម្ចាស់គ្រប់ព្រះអង្គ ព្រះករុណាជាម្ចាស់ គ្រប់ព្រះអង្គទាំងអស់ និងពុទ្ធបរិស័ទាំងក្នុងនិងក្រៅប្រទេស ក្រែងលោខ្ញុំព្រះកុរណា អត្មាភាព មានកាយវិការណាមួយ ពាក្យសម្តីណាមួយ ក្នុងការពោលសម្តែងព្រះធម៌ ក៏ដូចជាការបង្ហាត់បង្ហាញផ្សេងៗមានការឆ្គាំឆ្គង មិនផ្គាប់ព្រះទ័យសម្តេចជាអម្ចាស់គ្រប់ព្រះអង្គ និងព្រះករុណាជាអម្ចាស់គ្រប់ព្រះអង្គ មិនផ្គាប់ដោយទឹកចិត្តរបស់ពុទ្ធបរិស័ទទាំងអស់ទាំងក្នុងនិងក្រៅប្រទេស ខ្ញុំព្រះករុណាអាត្មាភាព សុំអធ្រាស្រ័យ អភ័យទោស ដោយក្តីអនុគ្រោះ ដោយមិនមានចេតនាណាដើម្បីធ្វើឱ្យមានការប៉ះពាល់ការស្តាប់របស់ញាតិញោមនូវពាក្យសម្តីមិនល្អនូវការពោលសម្តែងធម៌នោះទេ។ ហើយអ្វីដែលខ្ញុំករុណាអាត្មាភាពបាន សម្រេចចិត្តនេះ គឹជាការសម្រេចចិត្តមួយ ចំពោះខ្លួនខ្ញុំករុណាអាត្មាភាព ផ្ទាល់តែម្តង គឺអស់បុណ្យជាព្រះសង្ឃតែម្តង គឺសម្រេចិត្តចាកចេញទៅជាឧបាសកមួយរូបនៅក្នុងព្រះពុទ្ធសាសនា។ ម្យ៉ាងទៀត ក៏សុំអរព្រះគុណនិងអរគុណដល់ពុទ្ធបរិស័ទទាំងអស់ដែលស្រឡាញ់គាំទ្រ ចូលចិត្ត ហើយបានទំនុកបម្រុង ចិញ្ចឹមព្រះសង្ឃ នៅក្នុងវត្តប្រាសាទនាងខ្មៅនេះ អស់រយៈកាល១៣ឆ្នាំ នេះ គឺពិតជាមានគុណមហាធំធេង ពិតមែនដែលគ្មានអ្វីប្រៀបផ្ទឹមបានចំពោះទឹកព្រះទ័យ ទឹកចិត្ត របស់សម្តេចក៏ដូចជាព្រះសង្ឃគ្រប់អង្គ និងពុទ្ធបរិស័ទ ទាំងក្នុង និងក្រៅប្រទេស ដើម្បីជួយឧបត្ថម្ភ ទំនុកបម្រុងទាំងព្រះសង្ឃ ការបណ្តុះបណ្តាលធនធាននៅក្នុងទីនេះ ទាំងការកសាងនូវហេដ្ឋារចនាសម្ព័ន្ធ និងថាវរៈវត្ថុសំណង់នៅក្នុងទីអារាមវត្ត ទាំងការកសាងនូវសាលារៀន ដើម្បីជូនដល់រដ្ឋ ជាមួយខ្ញុំករុណាអាត្មាភាពកន្លងមក»

(សូមអានបន្ត)

សម្ដេចតេជោ វាយតម្លៃខ្ពស់ចំពោះលោក ដូណាល់ ត្រាំ មានសេចក្តីក្លាហានចេញដឹកនាំពិភពលោកប្រយុទ្ធប្រឆាំងព័ត៌មានក្លែងក្លាយផ្តើមពីបណ្តាញព័ត៌មានដែលផ្តល់ថវិកាដោយរដ្ឋាភិបាលអាមេរិកជាមុន

ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទី នៅយប់ថ្ងៃទី១៧ ខែមីនា ឆ្នាំ ២០២៥នេះ បានបង្ហោះសារលើបណ្ដាញសង្គម បង្ហាញការវាយតម្លៃខ្ពស់ចំពោះលោក ដូណាល់ ត្រាំ មានសេចក្តីក្លាហានចេញដឹកនាំពិភពលោកប្រយុទ្ធប្រឆាំងព័ត៌មានក្លែងក្លាយផ្តើមពីបណ្តាញព័ត៌មានដែលផ្តល់ថវិកាដោយរដ្ឋាភិបាលអាមេរិកជាមុន។

សម្ដេចតេជោ បានសរសេរថា៖«យើងគួរតែវាយតម្លៃខ្ពស់ចំពោះលោកប្រធានាធិបតី ដូណាល់ ត្រាំ ដែលមានសេចក្តីក្លាហានចេញដឹកនាំពិភពលោក ដើម្បីប្រយុទ្ធប្រឆាំងព័ត៌មានក្លែងក្លាយ ដោយចាប់ផ្តើមពីបណ្តាញព័ត៌មានដែលផ្តល់ថវិកាដោយរដ្ឋាភិបាលអាមេរិកជាមុន»។

សម្ដេចប្រមុខរដ្ឋស្ដីទី បានបញ្ជាក់ថា នេះជាការរួមចំណែកដ៏ធំដើម្បីលុបបំបាត់ព័ត៌មានក្លែងក្លាយ ព័ត៌មានភូតកុហក លាបពណ៌ អុជអាល ញុះញង់ បង្កចលាចលស្ទើរពេញពិភពលោក ដែលចេញមកពីក្បាលម៉ាស៊ីនឃោសនាដែលលោកប្រធានាធិបតី ត្រាំ បញ្ឈប់ការផ្តល់ថវិកា។

សម្ដេចតេជោថ្លែងថា៖«ដូចខ្ញុំបានជម្រាបអង្គប្រជុំអាស៊ាន អាមេរិកចំពោះមុខលោកប្រធានាធិបតី ត្រាំ នៅហ្វីលីពីនឆ្នាំ២០១៧ ថា ការមិនទុកលើអាមេរិកដោយប្រទេសមួយចំនួន វាក៏មានចំណែកចេញមកពីប្រព័ន្ធផ្សព្វផ្សាយអាមេរិក ដែលធ្វើឲ្យប្រទេសទាំងនោះយល់ច្រឡំថា ជាគោលជំហររដ្ឋាភិបាលអាមេរិក»។

សម្ដេចតេជោបានបញ្ជាក់ថា៖«ចរិតមាយាទ និងសំដីនៃអ្នកយកព័ត៌មាន និងអ្នកនិយាយព័ត៌មានមួយចំនួនតូចនៃបណ្តាញព័ត៌មាននេះឫកធំជាងប្រមុខរដ្ឋ ឬប្រមុខរដ្ឋាភិបាលទៅទៀត គ្មានគុណធម៌ និងសីលធម៌ទេ»៕

(សូមអានបន្ត)

ចៅសង្កាត់តាខ្មៅ លោក ជៀម ខូយ និងកូនប្រុសស្រីចំនួន២នាក់ទៀត ត្រូវបានរដ្ឋមន្ត្រីក្រសួងមហាផ្ទៃបញ្ជាឲ្យអភិបាលខេត្តកណ្តាលឲ្យបញ្ចប់មុខងារពីជំនួយការនិងអនុវត្តនីតិវិធីច្បាប់

(កណ្ដាល)៖ លោក ជៀម ខូយ ចៅសង្កាត់តាខ្មៅ និងកូនប្រុសស្រីចំនួន២នាក់ទៀត រួមជាមួយឈ្មោះ សុខ សុផា ស្មៀនសង្កាត់តាខ្មៅ ត្រូវបានលោកវរសេនីយ៍ត្រី ហោ សំអុល អតីតនាយប៉ុស្តិ៍នគរបាលរដ្ឋបាលតាខ្មៅមានទីលំនៅផ្ទះលេខ៦៥ ផ្លូវលេខ២ ភូមិព្រែកសំរោង៣ សង្កាត់តាខ្មៅ ក្រុងតាខ្មៅ ខេត្តកណ្តាលកាលពីថ្ងៃទី១៩ ខែកក្កដា ឆ្នាំ២០២១ ប្ដឹងទៅលោកអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ។ នេះបើតាមស.ជ.ណ. ចុះថ្ងៃទី៥ ខែមីនា ឆ្នាំ២០២៥របស់ក្រសួងមហាផ្ទៃដែលអង្គភាព Phally News ទើបទទួលបាននៅថ្ងៃទី១៥ ខែមីនា ឆ្នាំ២០២៥នេះ។

ប្រភពបានឲ្យដឹងថា ក្រោយក្រសួងមហាផ្ទៃបានទទួលពាក្យបណ្ដឹងសុំប្តឹង៖ ១.លោក ជៀម សំរិតធី មន្ត្រីនគរបាល គ្រឿងញៀន នៃអធិការដ្ឋាននគរបាលក្រុងតាខ្មៅ ស្នងការដ្ឋាននគរបាលខេត្តកណ្តាល ២.លោក ជៀម ខូយ ចៅសង្កាត់តាខ្មៅ ៣.លោក សុខ សុផា ស្មៀនសង្កាត់តាខ្មៅ និង៤.លោកស្រី ជៀម សំរិតសោភា ជាអ្នក សរសេរលើសំបុត្រកំណើត(កាន់ឯកសាររត់ការ)ពីបទ«រំលោភអំណាច និងប្រព្រឹត្តអំពើពុករលួយ»។

បន្ទាប់មកក្រសួងមហាផ្ទៃបានចាត់មន្ត្រីធ្វើអធិការកិច្ចនិងពិនិត្យឯកសារពាក់ព័ន្ធរួចមក ក្រសួងមហាផ្ទៃប្រគល់ភារកិច្ចជូនរដ្ឋបាលខេត្តកណ្តាលធ្វើលិខិតណែនាំទៅរដ្ឋបាលសង្កាត់តាខ្មៅឱ្យ «បញ្ចប់មុខងារលោកស្រី ជៀម សំរិតសោភា ជាជំនួយការរដ្ឋបាលសង្កាត់តាខ្មៅ ក្រុងតាខ្មៅ ខេត្តកណ្តាល»។

ទាក់ទិនករណីនេះ ក្រសួងក៏បានឲ្យអនុវត្តនីតិវិធីច្បាប់ទៅលើលោក ជៀម ខូយ ចៅសង្កាត់តាខ្មៅ ក្រុងតាខ្មៅ ខេត្តកណ្តាល ដែលបានចេញសំបុត្របញ្ជាក់កំណើតឱ្យជនជាតិវៀតណាម ដែលជាជនបរទេសអន្តោប្រវេសន៍ផងដែរ។

ទន្ទឹមនេះ ក្រសួងមហាផ្ទៃបានសង្កត់ធ្ងន់ឲ្យអភិបាលខេត្តកណ្តាល ត្រូវតែអនុវត្តតាមការណែនាំខាងលើនេះឱ្យមានប្រសិទ្ធភាពខ្ពស់៕

(សូមអានបន្ត)