ឯកឧត្តម វ៉ី សំណាង អភិបាលខេត្តតាកែវ បានអញ្ជើញបើកបវេសនកាលឆ្នាំសិក្សាថ្មីរបស់សាលាចំណេះដឹងទូទៅញូខាសល ដែលជាសាលាឯកជនមួយនាព្រឹកថ្ងៃសុក្រ ទី៤ ខែកញ្ញា ឆ្នាំ២០២៦ ក្នុងក្រុងដូនកែវ។ ក្នុងឱកាសនោះ លោកអភិបាលខេត្តបានជម្រុញ និងលើកទឹកចិត្តយ៉ាងខ្លាំងដល់វិស័យឯកជន ឲ្យបន្តចូលរួមអភិវឌ្ឍន៍វិស័យអប់រំនៅក្នុងខេត្តតាកែវ ឲ្យកាន់តែមានការរីកចម្រើនខ្លាំងឡើង។
អភិបាលខេត្ត បានគូសបញ្ជាក់ថា ការចូលរួមរបស់វិស័យឯកជនក្នុងការអភិវឌ្ឍវិស័យអប់រំ គឺជាយន្តការដ៏សំខាន់មួយ ដែលរាជរដ្ឋាភិបាលតែងតែលើកទឹកចិត្ត និងចាត់ទុកជាដៃគូយុទ្ធសាស្ត្រមិនអាចខ្វះបាន ដើម្បីជួយជម្រុញ ការបណ្តុះបណ្តាលធនធានមនុស្សនៅកម្ពុជាឲ្យកាន់តែល្អប្រសើរ។
បច្ចុប្បន្ន វិស័យឯកជនបានចូលរួមបង្កើតសាលារៀនមត្តេយ្យសិក្សា បឋមសិក្សា មធ្យមសិក្សា និងឧត្តមសិក្សាឯកជនជាច្រើន ជាពិសេសបានផ្ដល់អាហារូបករណ៍ដល់សិស្សានុសិស្សទើបប្រលងជាប់សញ្ញាបត្របាក់ឌុប ដើម្បីពង្រីកលទ្ធភាពទទួលបានការអប់រំ និងឱកាសការងារដល់យុវជនក្រោយបញ្ចប់ការសិក្សា។
ឆ្លៀតក្នុងឱកាសនោះ ឯកឧត្តម វ៉ី សំណាង ក៏បានណែនាំដល់សិស្សានុសិស្សទាំងអស់ ឲ្យខិតខំសិក្សារៀនសូត្រឲ្យបានខ្លាំងក្លា ដើម្បីក្លាយជាធនធានមនុស្សដែលមានសមត្ថភាពពិតប្រាកដ ចូលរួមកសាង និងអភិវឌ្ឍន៍ប្រទេសជាតិ ឲ្យកាន់តែមានការរីកចម្រើនបន្តទៅមុខទៀត។ ការចូលរួមពីគ្រប់ភាគី ជាពិសេសវិស័យឯកជន គឺជាកម្លាំងចលករដ៏សំខាន់ក្នុងការកសាងមូលដ្ឋានគ្រឹះអប់រំរឹងមាំសម្រាប់អនាគតកម្ពុជា៕
