ល្បែងស៊ីសងមាន់ជល់អនឡាញ បង្កប់នៅក្នុងហាងកាហ្វេខាងលិចផ្សារត្រែងត្រយឹង កំពុងដំណើរការជាចំហយ៉ាងគគ្រឹកគគ្រេង

ខេត្តកំពង់ស្ពឺ៖ តាមសេចក្តីរាយការណ៍ប្រជាពលរដ្ឋបានប្រាប់មកថា ម្ចាស់ទីតាំងបនល្បែងសុីសងមាន់ជល់តាមប្រពន្ធ័អនឡាញច្រើនកន្លែង ស្ថិតនៅលើផ្លូវក្រាលកៅស៊ូ ឡើងទៅឧទ្យានជាតិគិរីរម្យ ខាងលិចផ្សារត្រែងត្រយឹងប្រហែលជា២០០ម៉ែត្រ នៅបង្កប់ក្នុងហាងលក់កាហ្វេ ស្ថិតនៅក្នុងផ្សារត្រែងត្រយឹង ឃុំត្រែងត្រយឹង និងភូមិទី ៣ ឃុំយាយម៉ៅពេជ្រនិល ស្រុកភ្នំស្រួច មានខ្នងបង្អែករឹងមាំហើយ បានជាមានឥទ្ធិពល ទើបហ៊ានធ្វើអ្វីៗតាម ទំនើងចិត្តបើកល្បែងសុីសងមាន់ជល់អនឡាញមិនខ្លាចញញើតច្បាប់និងអាជ្ញាធរមានសមត្ថកិច្ចដូច្នេះ។

ប្រភពព័ត៌មានពីប្រជាពលរដ្ឋបានបន្តទៀតថា ទីតាំងល្បែងសុីសងមាន់ជល់ តាមប្រពន្ធ័អនឡាញ មួយកន្លែងនេះ កំពុងបើកដំណើរការលេងនៅភូមិសាស្រ្តខាងលើនេះ គេសង្កេតឃើញថា កំពុងបើកដំណើរការយ៉ាងពេញបន្ទុក ពោលគឺបើកលេងរាល់ថ្ងៃ រាល់យប់ តែម្តង គេមិនដែលឃើញ មន្ត្រីអាជ្ញាធរនិងសមត្ថកិច្ចជំនាញពាក់ព័ន្ធក្នុងមូលដ្ឋាន ធ្វើការចុះបង្ក្រាប ឬទប់ ស្កាត់ ទាល់តែសោះ ។

ប្រជាពលរដ្ឋ ក្នុងភូមិផ្សារត្រែងត្រឹង ឃុំត្រែងត្រយឹង និងក្នុងភូមិទី៣ ឃុំយាយម៉ៅពេជ្រនិល ស្រុកភ្នំស្រួច បានរិះគន់ចំៗថា បើគ្មានការបើកភ្លើងខៀវឬក៏មានការឃុបឃិត គ្នា ជាប្រព័ន្ធ និងមានខ្នងបង្អែក រឹងមាំ ទេនោះ! ម្ចាស់ទីតាំងបនល្បែង និងបក្ខពួករបស់ម្ចាស់ទីតាំងខាងលើ មិនអាចសាងភាពល្បីល្បាញ បើកល្បែងសុីសងមាន់ ជល់តាមប្រពន្ធ័អនឡាញ នៅលើទឹកដី ឃុំត្រែងត្រយឹង ឃុំយាយម៉ៅពេជ្រនិល នៃស្រុកភ្នំស្រួច បានឡើយ។

តាមប្រភពព័ត៌មានដដែលបានបន្ថែមថា ល្បែងសុីសងខុសច្បាប់នេះហើយ ដែលជាដើមចមធ្វើឲ្យប្រជាពលរដ្ឋ រស់នៅមានការព្រួយបារម្ភ ជាខ្លាំង,ប្រពន្ធឈ្លោះប្រកែក ជាមួយប្ដីៗបង្កើតឲ្យមានអំពើហិង្សា រឿងចាញ់ល្បែងលក់ទ្រព្យសម្បត្តិនានា ។ ម្យ៉ាងទៀតពួកគាត់បារម្ភភ័យខ្លាច កើតមានអំពើចោរកម្ម និងបទល្មើស ផ្សេងៗ ដូចជា ចោរលួច ចោរឆក់ និងចោរប្លន់ ជា ពិសេស អំពើហិង្សា ក្នុងគ្រួសារ ជាដើម។ បនល្បែងស៊ីសងមាន់ជល់អនឡាញនេះនៅក្បែរផ្សារត្រែងត្រយឹង មិនក្រោម៥~ ៦កន្លែងនោះទេ។

ជុំវិញបញ្ហាបនល្បែងស៊ីសងមាន់ជល់តាមប្រព័ន្ធអនឡាញម្ចាស់កំពុងតែបើកដំណើរការយ៉ាងរលូនរាល់ថ្ងៃខាងលើនេះ ប្រជាពលរដ្ឋ សំណូមពរដល់លោកអធិការនគរបាលស្រុកភ្នំស្រួច និងលោកស្នងការនគរបាលខេត្តកំពង់ស្ពឺ សូមជួយចាត់មន្ត្រីក្រោមឱវាទ ចុះទប់ស្កាត់ និងបង្រ្កាប ទីតាំងល្បែងស៊ីសងតាមប្រព័ន្ធអនឡាញ ជាច្រើនកន្លែង ស្ថិតនៅក្នុងភូមិផ្សារត្រែងត្រយឹង ឃុំត្រែងត្រយឹង និងក្នុងភូមិទី៣ ឃុំយាយម៉ៅពេជ្រនិល ស្រុកភ្នំស្រួច ខេត្តកំពង់ស្ពឺផង ដើម្បី ឱ្យស្របទៅតាមគោលនយោបាយ-ភូមិ-ឃុំ-សង្កាត់-មានសុវត្ថិភាព ទាំង៧ចំណុច របស់ រាជរដ្ឋាភិបាល ដែលបានកំណត់ និងដាក់ចេញឲ្យ មន្ត្រីថ្នាក់ក្រោមជាតិ អនុវត្ត ទប់ស្កាត់ និងបង្ក្រាប ទីតាំងល្បែងស៊ីសង គ្រប់ប្រភេទនៅទូទាំងប្រទេសកន្លងមកនោះ៕

(សូមអានបន្ត)

ក្រសួងព័ត៌មានបើកកិច្ចប្រជុំករណីប្តឹងស្ត្រីអ្នកលក់ទំនិញអនឡាញម្នាក់ ដែលបានប្រមាថ មើលងាយអ្នកសារព័ត៌មានថា ជាអ្នកបំពុលសង្គម ៨០ភាគរយ

ភ្នំពេញ÷នៅវេលាម៉ោង២រសៀល ថ្ងៃទី០៧ ខែឧសភា ឆ្នាំ២០២៥ ក្រោមអធិបតីភាព ឯកឧត្តម ឈុំ សុជាតិ រដ្ឋលេខាធិការក្រសួងព័ត៌មាន ,លោក ទេស វិបុល ប្រធាន និង លោក ថាំង ប៊ុនសុង អគ្គលេខាធិការ សមាគមសេរីភាពអ្នកសារព័ត៌មានកម្ពុជា ចូលរួមប្រជុំនៅ ក្រសួងព័ត៌មាន ដើម្បីពិភាក្សាលើការពង្រឹង និងដោះស្រាយ ពាក្យបណ្តឹងរបស់សមាគម ដែលបានប្តឹងស្ត្រីអ្នកលក់ទំនិញអនឡាញម្នាក់ ដែលបានប្រមាថ មើលងាយអ្នកសារព័ត៌មានថា ជាអ្នកបំពុលសង្គម ៨០ភាគរយ។

នៅក្នុងកិច្ចប្រជុំនោះ ស្ត្រីអ្នកលក់ទំនិញអនឡាញដែលប្រមាថ មើលងាយអ្នកសារព័ត៌មានថា ជាអ្នកបំពុល សង្គម៨០ភាគរយនោះមិនបានចូលរួមទេ។ ក្រសួង ព័ត៌មាននិងសមាគមសេរីភាពអ្នកសារព័ត៌មានកម្ពុជារំពឹងថា កិច្ចប្រជុំលើកក្រោយស្ត្រីខាងលើនឹងចូលរួមដើម្បីបង្ហាញឆន្ទៈអំពីការស្វែងរកដំណោះ ស្រាយ។

សូមបញ្ជាក់ថា កាលពីថ្ងៃទី២៤ ខែមេសា ឆ្នាំ២០២៥ លោក ទេស វិបុល ប្រធាន សមាគមសេរីភាពអ្នក សារព័ត៌មានកម្ពុជា បានធ្វើលិខិតមួយច្បាប់ គោរពជូន ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន ដើម្បីសុំឱ្យក្រសួងព័ត៌មានត្រួតពិនិត្យ និងចាត់វិធានការលើស្ត្រីអ្នកលក់ទំនិញអនឡាញម្នាក់ដែលបានប្រើហ្វេសប៊ុកផេកឈ្មោះ MADAM DA (ម៉ាដាមដា) ផ្សាយផ្ទាល់ និងបង្ហោះវីដេអូ កាលពីថ្ងៃទី២០និង២១ ខែមេសា ឆ្នាំ ២០២៥ ប្រមាថមើលងាយអ្នកសារព័ត៌មានថា ជាអ្នកបំពុលសង្គមចំនួន៨០ភាគរយ៕

(សូមអានបន្ត)

ឯកឧត្តម នេត្រ ភក្ត្រា ដឹកនាំគណៈប្រតិភូក្រសួងព័ត៌មានចូលរួមកិច្ចប្រជុំរដ្ឋមន្ត្រីទទួលបន្ទុកព័ត៌មានអាស៊ាន លើកទី១៧ និងកិច្ចប្រជុំពាក់ព័ន្ធ នៅប្រទេសព្រុយណេ

ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាននៃព្រះរាជាណាចក្រកម្ពុជា បានដឹកនាំគណៈប្រតិភូក្រសួងព័ត៌មាន ចូលរួមកិច្ចប្រជុំរដ្ឋមន្ត្រីទទួលបន្ទុកព័ត៌មានអាស៊ានលើកទី១៧ (17th AMRI) និងកិច្ចប្រជុំពាក់ព័ន្ធ ក្នុងឋានៈកម្ពុជាជាអនុប្រធាននៃកិច្ចប្រជុំនៅប្រទេសព្រុយណេដារូស្សាឡាម ចាប់ពីថ្ងៃទី៧ ដល់ថ្ងៃទី៩ ខែឧសភា ឆ្នាំ២០២៥។

ក្នុងនាមជាប្រធាននៃកិច្ចប្រជុំ ប្រទេសព្រុយណេបានរៀបចំសន្និសីទនេះឡើងក្រោមប្រធានបទ «ប្រព័ន្ធផ្សព្វផ្សាយជំរុញការយល់ដឹងរួម៖ ការផ្លាស់ប្តូរតួនាទីរបស់ប្រព័ន្ធផ្សព្វផ្សាយក្នុងការជំរុញកិច្ចសហប្រតិបត្តិការ និងការយល់ដឹងគ្នាទៅវិញទៅមកនៅក្នុងអាស៊ាន MAJU» ដែលសង្កត់ធ្ងន់ទៅលើតួនាទីវិវត្តនៃប្រព័ន្ធផ្សព្វផ្សាយក្នុងការពង្រឹងកិច្ចសហប្រតិបត្តិការក្នុងតំបន់ អត្តសញ្ញាណ និងការយោគយល់គ្នាទៅវិញទៅមក។ កិច្ចប្រជុំនេះ មានការចូលរួមពីសំណាក់រដ្ឋសមាជិកអាស៊ានទាំងអស់ ប្រទេសទីម័រខាងកើត ប្រទេសចិន ជប៉ុន សាធារណរដ្ឋកូរ៉េ និងលេខាធិការដ្ឋានអាស៊ាន។

នៅក្នុងព្រះរាជសុន្ទរកថាបើកកិច្ចប្រជុំ ព្រះអង្គម្ចាស់ HAJI AL-MUHTADEE BILLAH  IBNI HIS MAJESTY SULTAN HAJI HASSANAL BOLKIAH MU’IZZADDIN WADDAULAH ជាព្រះរជ្ជទាយាទ និងជាទេសរដ្ឋមន្ត្រីនៃទីស្តីការនាយករដ្ឋមន្ត្រីនៃប្រទេសព្រុយណេ បានមានបន្ទូលគូសបញ្ជាក់ពីសារៈសំខាន់នៃការចូលរួមប្រព័ន្ធផ្សព្វផ្សាយជាយុទ្ធសាស្ត្រក្នុងការលើកកម្ពស់មជ្ឈភាពអាស៊ាន។

គួរបញ្ជាក់ថា ប្រទេសកម្ពុជានឹងទទួលធ្វើជាប្រធានប្តូរវេននៃកិច្ចប្រជុំ AMRI លើកទី១៨ នៅឆ្នាំ២០២៧ខាងមុខ។

រូបថតដោយ ឡុង ដេវីត

(សូមអានបន្ត)