សិប្បកម្មរណ្ដៅដីឈ្មួញស្រៀង ផេង កំពុងបង្កហានិភ័យនិងធ្វើឲ្យប្រជាពលរដ្ឋនៅស្រុកខ្សាច់កណ្ដាលក្តៅក្រហាយ

ខេត្តកណ្ដាល÷ក្រោមលេស នៃអាជ្ញាប័ណ្ណស្របច្បាប់សិប្បកម្មរណ្តៅដីរបស់ឈ្មួញស្រៀង ផេង កំពុងបង្កឲ្យប្រជាពលរដ្ឋក្នុងមូលដ្ឋានជាច្រើនកន្លែងនៅក្នុងស្រុកខ្សាច់កណ្ដាលក្តៅក្រហាយជាខ្លាំង។ ប៉ុន្តែវាជាការឃុប ឃិតគ្នារវាងអាជ្ញាធរស្រុកខ្សាច់កណ្ដាល ជាមួយឈ្មួញក្នុងផលប្រយោជន៍របស់ពួកគេជាបុគ្គលប៉ុន្មាននាក់នោះប៉ុណ្ណោះ។ ដូច្នេះបើទោះប្រជាពលរដ្ឋ ក្តៅក្រហាយយ៉ាង ណាក៏គ្មានដំណោះស្រាយដែរ។

នៅឯចំណុចវាលបឹងការថុកថាក ស្ថិតក្នុងឃុំព្រះប្រសប់ ទីដែលប្រជាពលរដ្ឋកំពុងធ្វើស្រែ ដីមួយចំនួនត្រូវបានឈ្មួញខាងលើនេះទិញ ដើម្បីកាយយកអាចម៍ដីលក់ឱ្យសិប្បកម្មធ្វើឥដ្ឋ។ ការកាយយកអាចម៍ដីដែលមិនគោរពតាមបទដ្ឋានបច្ចេកទេស ធ្វើឲ្យដីស្រែជិតខាងរបស់ប្រជាពលរដ្ឋត្រូវបាក់ធ្លាក់ចូលក្នុងរណ្ដៅនោះ។ ដូច្នេះរឿងអីដែលមិនធ្វើឲ្យម្ចាស់ស្រែនៅជិតខាងដែលមិនលក់ឲ្យឈ្មោះ ស្រៀង ផេង ក្តៅក្រហាយ។ បើពិនិត្យមើលពីលើអាកាសស្ថានភាពនៃការជីកយកអាចម៍ដីកំពុងកើតឡើងដូចរន្ធបាយខុំ។

ប្រជាពលរដ្ឋនៅទីប្រជុំជន នៃឃុំព្រះប្រសប់និយាយថា បុគ្គលខាងលើក្រោមលេស នៃអាជ្ញាប័ណ្ណដឹកដី,ជីកយកអាចម៍ដីស្របច្បាប់បង្កការក្តៅក្រហាយដល់ប្រជាពលរដ្ឋនៅក្នុងសហគមន៍ខាងលើនេះជាយូរណាស់មកហើយ។ ប្រជាពលរដ្ឋសង្កេតឃើញថាការដឹកជញ្ជូនអាចម៍ដីតាម រថយន្តធំៗ ដែលមិនគ្របឱ្យបានត្រឹមត្រូវ បណ្ដាលឲ្យជ្រុះធ្លាក់រប៉ាត់រប៉ាយពេញផ្លូវ ធ្វើឱ្យផ្លូវដីមួយចំនួននៅ ក្នុងមូលដ្ឋានខាងលើរងការខូចខាត ពិបាកក្នុងការធ្វើ ដំណើរ។ រថយន្តធំៗដឹកដីដែលមិនគ្របបង្កឲ្យហុយប៉ះពាល់បរិស្ថាន ....ជាពិសេសបង្កហានិភ័យនៃគ្រោះ ថ្នាក់ចរាចរណ៍ជាញឹកញាប់។

ប្រជាពលរដ្ឋនិយាយថា បុគ្គលស្រៀង ផេង ហាក់ដូចជាអាងអំណាចអ្វីម្យ៉ាងនៅក្នុងមូលដ្ឋាន ដោយមិនគោរពតាមបទដ្ឋានបច្ចេកទេស នៃការដឹកជញ្ជូននិងការជីក រណ្ដៅដីនោះឡើយ។ រីឯអាជ្ញាធរមូលដ្ឋានឃុំ-ស្រុក មិន បានយកចិត្តទុកដាក់ ឆ្លើយតបចំពោះការលំបាករបស់ប្រជាពលរដ្ឋនោះឡើយ។ មានន័យថា ផ្លូវខូចដោយសាររថយន្តដឹកដី...ផ្លូវហុយទ្រលោមប៉ះពាល់ដល់សុខភាពប្រជាពលរដ្ឋ,នៅឯទីវាលរណ្ដៅដីជ្រៅៗប៉ះពាល់ដល់ស្រែចំការអ្នកភូមិជិតខាង....ក៏អាជ្ញាធរមូលដ្ឋានឃុំនិងស្រុកធ្វើមិនដឹងមិនឮ..។

ប្រជាពលរដ្ឋក្នុងមូលដ្ឋានខាងលើនិយាយថា ឈ្មួញរណ្ដៅដីឈ្មោះ ស្រៀង ផេងដ៏ល្បីល្បាញនេះឈប់គិតត្រូវរូវជាមួយអាជ្ញាធរមិនខ្វល់អំពីការលំបាកហានិភ័យផ្សេងៗរបស់ប្រជាពលរដ្ឋនៅក្នុងមូលដ្ឋាននេះឡើយ។ឈ្មួញខាងលើរកស៊ីយូឆ្នាំមកហើយនៅក្នុងទឹកដីស្រុកខ្សាច់កណ្ដាល ទំនងជំនាញខ្នងបង្អែករឹងមាំ៕

(សូមអានបន្ត)

អាជ្ញាធរខេត្តកណ្ដាលនឹងចាត់វិធានការតាមផ្លូវច្បាប់ចំពោះក្រុមអាជីវកររូបណាដែលមិនរុះរើសំណង់ ស្លាកយីហោ ហាង តូបលក់ដូរ ដំបូលចេញពីចិញ្ចើមផ្លូវ និងទ្រូងផ្លូវ២០៥

(កណ្ដាល)៖ លោក ណុប ដារ៉ា អភិបាលរងខេត្តកណ្តាល លោក ឃឹម សំភារ អភិបាលក្រុងតាខ្មៅ នៅព្រឹកថ្ងៃទី ២១ ខែមេសា ឆ្នាំ ២០២៥នេះ បានដឹកនាំក្រុមការងាររដ្ឋបាលក្រុងតាខ្មៅ អាជ្ញាធរសង្កាត់តាខ្មៅ មន្ត្រីជំនាញពាក់ព័ន្ធ សមត្ថកិច្ចចរាចរណ៍នៃអធិដ្ឋាននគរបាលក្រុងតាខ្មៅចុះពិនិត្យ និងជម្រាបដំណឹងដល់បងប្អូនអាជីវករ លក់ដូរ ដែលមានលំនៅដ្ឋានតាមសងខាងផ្លូវ២០៥ នៅខាងកើតផ្សារតាខ្មៅចាស់ ស្តីពីការរៀបចំសណ្តាប់ធ្នាប់ល្អក្នងក្រុងតាខ្មៅ និងសូមឲ្យបងប្អូនសហការក្នុងការងារនេះ ជាមួយអាជ្ញាធរ ដើម្បីសោភ័ណ្ឌភាព សណ្តាប់ធ្នាប់ល្អ ក្រុងតាខ្មៅយើងទាំងអស់គ្នា។

បើតាមអភិបាលរងខេត្តកណ្តាល លោក ណុប ដារ៉ា បានប្រាប់ឲ្យអ្នកកាសែត នៅព្រឹកនេះថា ជាដំបូងយើងត្រូវចុះមកពិនិត្យ និងជូនដំណឹងដល់បងប្អូនអាជីវករ លក់ដូរ ដែលមានលំនៅដ្ឋានតាមសងខាងផ្លូវ២០៥ជាមុនសិន បន្ទាប់មកអញ្ជើញគាត់ទៅប្រជុំជាមួយភាគីពាក់ព័ន្ធស្ដីពីផលប៉ះពាល់តាមបណ្ដោយផ្លូវ២០៥ដែលមានការរំលោភលើចិញ្ចើមផ្លូវ និងទ្រូងផ្លូវ និងបន្ទាប់មកទុកពេលឲ្យពួកគាត់រុះរើចេញដោយខ្លួនឯង បើមិនដូច្នេះទេ អាជ្ញាធរនឹងចាត់ការតាមនីតិវិធីច្បាប់ ព្រោះក្រោមការដឹកនាំរបស់លោក គួច ចំរើន អភិបាលខេត្តកណ្ដាល គឺលោកមានភាពទន់ភ្លន់តែម៉ឺងម៉ាត់។

លោកអភិបាលរងខេត្តក៏បានណែនាំដល់អាជ្ញាធរក្រុងតាខ្មៅ សង្កាត់តាខ្មៅនិងមន្ត្រីជំនាញត្រូវធ្វើការវាស់វែងទ្រូងផ្លូវ ចិញ្ចើមផ្លូវ និងធ្វើរបាយការណ៍ឲ្យបានច្បាស់លាស់ចំពោះផ្ទះអាជីវករណាខ្លះដែលបានរំលោភលើដីចិញ្ចើមផ្លូវ និងទ្រូង។ លោកបន្តថា លោកនឹងយកមកវិញដើម្បីធ្វើឲ្យមានសណ្ដាប់ធ្នាប់រៀបរយល្អឡើងវិញ។

បើតាមអាជីវករលក់នំពងទាបានឲ្យដឹងថា គាត់នឹងធ្វើតាមការណែនាំរបស់អាជ្ញាធរឲ្យរុះរើចេញពីចិញ្ចើមផ្លូវ ព្រោះគាត់ក៏ចង់បានបរិស្ថានស្អាត មានសណ្ដាប់ធ្នាប់ល្អដែរ។

បើតាមម្ចាស់ផ្ទះថតរូបក៏បានសម្ដែងការរីករាយចំពោះចំណាត់ការរបស់រដ្ឋបាលខេត្តកណ្ដាលក្នុងការរៀបចំឲ្យមានសណ្ដាប់ធ្នាប់ល្អផងដែរ ពួកគាត់រីករាយនឹងធ្វើតាមដោយស្ម័គ្រចិត្ត។

ពាក់ព័ន្ធករណីនេះ អាជីវករលក់មាសបានប្រាប់ឲ្យដឹងដែរ មុនពួកគាត់ចាប់ផ្ដើមសាងសង់ គាត់បានសុំច្បាប់ពីអាជ្ញាធរមូលដ្ឋានសង្កាត់តាខ្មៅរួចរាល់ ហើយក៏គាត់មានឯកសារដែរ។

ជុំវិញករណីខាងលើនេះ លោក ឃឹម សំភារ អភិបាលក្រុងតាខ្មៅបានគូសបញ្ជាក់ថា ចំពោះក្រុងគឺលោកមិនដែលបានអនុញ្ញាតឲ្យទេ។ លោកនឹងស្រាវជ្រាវករណីនេះថាតើអាជ្ញាធរណាអ្នកអនុញ្ញាតឲ្យសាងសង់រំលោភលើចិញ្ចើមផ្លូវបែបនេះ។

គួរជម្រាបថា នៅតាមបណ្ដោយផ្លូវ២០៥ ខាងកើតផ្សារតាខ្មៅចាស់មានក្រុមអាជីវករជាច្រើននាក់បានសង់សំយ៉ាប ធ្វើស្លាកយីហោ សង់តូប សង់ហាងដោយបានរំលោភយកទាំងដីចិញ្ចើមផ្លូវ និងទ្រូងផ្លូវយ៉ាងអាណាធិបត្តេយ្យបំផុត ជាពិសេសក្រុមអាជីវករលក់មាស លក់ពេជ្រតែម្ដង

(សូមអានបន្ត)

ក្រុមអ្នកលក់មាសផ្សារតាខ្មៅចាស់ជាច្រើននាក់បានកំពុងរំលោភយកដីចំណីផ្លូវរដ្ឋធ្វើអាជីវកម្ម ខណៈអាជ្ញាធរមូលដ្ឋានសង្កាត់-ក្រុងតាខ្មៅមិនមានវិធានផ្លូវច្បាប់ឲ្យបានតឹងរ៉ឹង

ខេត្តកណ្ដាល៖ នៅក្នុងពេលថ្មីៗនេះ មានក្រុមអ្នកលក់មាសជាច្រើននាក់នៅតាមបណ្តោយផ្លូវ២០៥ ជិតផ្សារតាខ្មៅចាស់ ស្ថិតនៅភូមិតាខ្មៅ២ សង្កាត់តាខ្មៅ ក្រុងតាខ្មៅ ខេត្តកណ្ដាលបានកំពុងរំលោភយកដីចំណីផ្លូវរដ្ឋ ចិញ្ចើមផ្លូវសាធារណៈ ដោយបានសង់សំណង់ និងដាក់តូបធ្វើជាកន្លែងលក់មាស ដោយគ្មានការអនុញ្ញាតពីអាជ្ញាធរមូលដ្ឋាននោះទេ។ អំពើនេះមិនត្រឹមតែប៉ះពាល់ដល់រូបភាពសណ្តាប់ធ្នាប់នៅក្នុងទីក្រុងទេ ប៉ុន្តែថែមទាំងបង្កឱ្យមានការកកស្ទះចរាចរណ៍ និងបង្កបញ្ហាសុវត្ថិភាពផងដែរ។ ជាពិសេសក្រុមអ្នកលក់មាសទាំងនោះបានធ្វើសំយ៉ាប ធ្វើស្លាកយីហោ ចាក់បេតុងគ្របលើលូសាធារណៈនិងចិញ្នើមផ្លូវសម្រាប់អ្នកថ្មើរជើងទៀតផង។ នេះបើតាមប្រភពដែលផល្លីញូវ ទទួលបាននៅថ្ងៃទី២០ ខែមេសា ឆ្នាំ២០២៥នេះ។

ប្រភពពីប្រជាពលរដ្ឋនៅក្នុងមូលដ្ឋានក្រុងតាខ្មៅបានស្នើសុំឱ្យអាជ្ញាធរមូលដ្ឋានចាត់វិធានការរហ័ស ដើម្បីបញ្ឈប់ការរំលោភដីរដ្ឋ និងស្ដារឡើងវិញនូវសណ្តាប់ធ្នាប់ក្នុងតំបន់នោះឲ្យមានប្រសិទ្ធិភាពខ្ពស់ ចៀសវាងមានការបំពានលើអចលនទ្រព្យសាធារណៈ ដើម្បីធានាបាននូវកិត្តិយស និងសុវត្ថិភាពសង្គម និងដើម្បីការពារទ្រព្យសម្បត្តិសាធារណៈ និងគាំទ្រការអភិវឌ្ឍទីក្រុងឲ្យមានរចនាសម្ព័ន្ធស្អាតស្អំ។

បើតាមពលរដ្ឋសុំមិនបញ្ចេញឈ្មោះបានឲ្យដឹងថា ការរំលោភដីចំណីផ្លូវសាធារណៈនិងចិញ្ចើមផ្លូវរដ្ឋពីក្រុមអ្នកលក់មាសទាំងនោះ បានបង្កឲ្យមានបញ្ហាច្រើនសន្ធឹកសន្ធាប់ដូចជា ការកកស្ទះចរាចរណ៍ពេលព្រឹកនិងល្ងាចដែលជាពេលមានចរាចរណ៍ច្រើន អ្នកបើកបរច្រើន និងបង្កឲ្យមានភាពលំបាកសម្រាប់អ្នកថែទាំអនាម័យក្នុងការទៅអនាម័យតាមដងផ្លូវផងដែរ។ ប្រភពបន្តថា អ្នកលក់មាសខ្លះបានភ្ជាប់ភ្លើងនិងទឹកដោយខុសច្បាប់ ក៏បង្កបញ្ហាអន្តរាយបន្ថែមទៀតដែរ។ ប្រភពបន្តទៀតថា ការចូលរួមប្រកបអាជីវកម្មលើដីចំណិផ្លូវសាធារណៈដោយខុសច្បាប់នេះ មិនត្រឹមតែបំផ្លាញដល់ការដឹកជញ្ជូនទេ ប៉ុន្តែថែមទាំងប៉ះពាល់ដល់ភាពស្មើគ្នានៃការប្រកួតប្រជែងនៅក្នុងទីផ្សារផងដែរ។

ប្រភពពីតុកាហ្វេថា ពាក់ព័ន្ធករណីខាងលើនេះ អាជ្ញាធរមូលដ្ឋានគួរប្រកាសឬចេញសេចក្តីជូនដំណឹងប្រាប់ឲ្យក្រុមអ្នកលក់មាសទាំងនោះបានយល់ពីផលប៉ះពាល់និងចាកចេញពីចំណីដីរដ្ឋឲ្យបានឆាប់រហ័ស មុនពេលអាជ្ញាធរចាប់អនុវត្តវិធានការតាមផ្លូវច្បាប់ ចំពោះអ្នកមិនគោរព សេចក្តីជូនដំណឹងនោះ អាចនឹងមានការដកហូតបណ្តាញភ្លើង ទឹកជាដើម។

ប្រជាពលរដ្ឋបានស្នើសុំដល់អាជ្ញាធរមូលដ្ឋានសង្កាត់តាខ្មៅ ក្រុងតាខ្មៅគួរតែមានការរឹតបន្តឹងអនុវត្តច្បាប់ កុំឲ្យកើតមានភាពអនាធិបតេយ្យ បាត់បង់ចិញ្ចើមផ្លូវសាធារណៈ បាត់បង់ដីចំណីផ្លូវរដ្ឋ គ្មានសណ្ដាប់ធ្នាប់ល្អ ដើម្បីការពារផ្លូវសាធារណៈដែលជាកម្មសិទ្ធិរបស់ប្រជាជនទាំងមូល និងធានាឱ្យទីក្រុងមានសណ្តាប់ធ្នាប់ ស្អាត និងអភិវឌ្ឍប្រកបដោយចីរភាព៕

(សូមអានបន្ត)